Ամրապնդել մանկական ամուսնությունների և զոհերի վրա դրանց կործանիչ հետևանքների կանխարգելմանն ուղղված ջանքերը, ավելացնել իրազեկության բարձրացման ջանքերը՝ խրախուսելու այդ պրակտիկայի դադարեցումը և համայնքներում ու ընտանիքներում հարթակներ ու հնարավորություններ ստեղծել՝ աղջիկների կրթություն ստանալու առավելությունների վերաբերյալ քննարկումների համար։ Սահմանել տույժեր այն անձանց համար, ովքեր իրականացնում են երեխաների ամուսնություն կամ նպաստում են դրան, և տուժողների համար ապահովել իրավական պաշտպանության արդյունավետ միջոցների և անհրաժեշտ պաշտպանության այլ ձեւերի մատչելիություն։

Ավելացնել ջանքերը երեխաների ապաինստիտուցիոնալացմանը նպաստելու և խթանելու ուղղությամբ և ապահովել երեխաներին խնամատարության հանձնելու և հաստատություններում տեղավորելու գործընթացի պարբերական դիտարկումը:

Աջակցել և ապահովել երեխաների խնամքն իրենց կենսաբանական ընտանիքներում, այդ թվում՝ մեկ ծնողից բաղկացած ընտանիքներում, ներդնել ընտանիքներում երեխաների վերաինտեգրման հնարավորությունների ընդլայնման և խթանման մեխանիզմներ և խրախուսել խնամատար ընտանիքներին՝ որդեգրելու երեխաներ՝ անկախ նրանց տարիքից կամ հաշմանդամությունից՝ համապատասխան ընտանիքների համար իրականացնելով անհրաժեշտ վերապատրաստում և տրամադրելով աջակցություն՝ հաշմանդամություն ունեցող երեխայի պատշաճ խնամքն ապահովելու համար:

Կատարել երեխաների բյուջետային կարիքների համապարփակ գնահատում և հատկացնել համարժեք բյուջետային միջոցներ՝ համախառն ներքին արդյունքի համամասնությամբ, համաձայն Կոնվենցիայի 4-րդ հոդվածի և, մասնավորապես, ավելացնել սոցիալական ոլորտներին հատկացվող բյուջեն և լուծել անհավասարությունները՝ հիմնվելով երեխաների իրավունքներին վերաբերող ցուցանիշների վրա:

Կիրառել Սահմանադրության 37-րդ հոդվածը, Ընտանեկան օրենսգիրքը և այլ օրենքներ, որոնք սահմանում են երեխաների իրավունքը՝ իրենց լավագույն շահերը որպես առաջնային նկատառում դիտարկելու, և ապահովել, որ այն պատշաճ կերպով ներառվի, հետևողականորեն մեկնաբանվի և կիրառվի բոլոր օրենսդրական, վարչական և դատական գործընթացներում և որոշումներում, ինչպես նաև բոլոր քաղաքականություններում, ծրագրերում և նախագծերում, որոնք վերաբերում են երեխաներին և ազդեցություն ունեն նրանց վրա:

Ապահովել երեխաների իրավունքը՝ տարբեր աղբյուրներից տեղեկատվություն ստանալու վերաբերյալ, այդ թվում՝ առցանց աղբյուրներից, և պատշաճ կերպով պաշտպանել երեխաներին վնասակար բովանդակությունից և նյութերից, նաև առցանց ռիսկերից, ինչպես նաև նախատեսել խախտումները հետապնդելու համար մեխանիզմներ:

Բարելավել երեխաների, ուսուցիչների և ընտանիքների թվային գրագիտությունն ու հմտությունները՝ երեխաների բարեկեցությունը վնասող տեղեկատվությունից և նյութերից պաշտպանելու համար:

Մշակել երեխաների նկատմամբ բռնության, այդ թվում սեռական և շահագործման կանխարգելման և դրա դեմ պայքարի համապարփակ ռազմավարություն: